Nomear Pazos é falar dun lugar de ensoño, dos máis visitados e fotografados do Concello de Sillleda. Nesta parroquia o pequeno río Toxa foi capaz de dar nome propio á Fervenza máis alta de Galicia, cunha caída libre de cincuenta metros. Admirala dende os miradoiros ou dende o mesmo pé, na fraga que alí se forma, é unha experiencia que ninguén debe deixar pasar.
Dende este punto comeza a Senda do Deza, homologada pola Federación Galega de Montañismo, que une nun trazado de dificultade media os puntos máis emblemáticos do Concello, a Fervenza e o Mosteiro de Carboeiro, pasando pola Praia Fluvial da Carixa, en Vila de Cruces. |